भारंड

 

भारंड-

नृत्य शिकणार्‍या मुलीने मला भरतनाट्यम नृत्यातील "रुंडभारुंड"ची हस्तमुद्रा करून दाखली. आणि मला त्या काल्पनिक पक्ष्याचा फोटोही दाखवला. मला पंचतंत्रातील गोष्ट माहित होती. दोघींना  नवीन माहिती मिळाली.

पक्षी होता एक तयाचे । नाव म्हणे भारंड

दोन पाय अन दोन पंख त्या । एकचि होते पोट

होती त्यासी दोन शिरे अन । होत्या माना दोन

दोन दिशांना तोंडे त्याची। करिती नित्य भांडण

 

 

सागरतीरी हिंडत होता । भक्ष्याच्या शोधात

लाटांवरुनी तोच तरंगत । कुठलेसे आले फळ

एक चोच ती पकडे फळ ते । रसाळ अन् आकर्षक

पहिले मुख ते खाता वदले । स्वादिष्ट जणु अमृत

 

खाइन अर्धे देइन अर्धे । माझ्या मीच प्रियेस

दुजे तोंड ते वदे तयासी । मजला ही दे घास

रसाळ फळ ते कणभर मिळता ।  शमेल जिह्वालौल्य

सुखदुःखे ही एक आपुली । तृप्ती अपुली एक

 

परि दुर्लक्षुन दुजास तोची । वागे तसा खुशाल

फळ अर्धे ते खाऊन त्याने । दिले प्रियेसी खास

आनंदुन ती खाई फळ ते । दुजाकडे ना लक्ष

हिरमुसले मुख विरक्त झाले । सोसून तिरस्कार

 

परी अंतरी पेटुन उठले । घेऊ कसा प्रतिशोध

वेळ येऊ दे मग मी त्याला । दाविन इंगा थोर

एके दिवशी दिसली त्याला । विषवल्ली ती एक

लटकत होती फळे तियेला । जणु दुजेच हालाहल

 

विवेक सुटला त्याचा पुरता । रागाने तो अंध

तारतम्य ना तया राहिले । झेपावे त्वेशात

तोडुन घेता फळ चोचीने  । दुजा करी आकांत

अविचाराने घडेल तुझिया । दोघांचाही अंत

 

दुर्लक्षूनी तयास रागे । खाई फळ भारंड

एक यातना दोघांनाही । तडफडती ते मूर्ख

एकच होते भाग्य तयांचे । अन मरण एकसाथ

आडमुठ्यांना देहांताची ।  लिहिली शिक्षा एक

 

------------

मला विचारे गोष्ट ऐकुनी । छोटी माझी नात

गोष्टी मधला वेडा पक्षी । आजी! आहे ना खोटाच?

नाही बाळे आजही आपण । वंशज ह्याचे थोर

गिरवित कित्ता भारंडाचा । कधि न शहाणे होत

माहित आहे जरी अम्हासी । धरतो हेका एक

दोघांचाही अंत बरोबर । माहीत जरि हे सत्य!!

-------------------------------

#लेखणीअरुंधतीची -