तुलसीविवाह

 

तुलसीविवाह

दसरा सरला आत्ता म्हणता म्हणता दिवाळी येते.---- की आलच तुळशीचं लग्न!  मंजिर्‍यांनी डवरलेली अवखळ कृष्णतुळस त्या उगवत्या नारायणासोबत मनमुक्त हसत आणि ‘‘डुले मंजिरी मंजिरी प्राजक्ताच्या पायापाशी’’ म्हणत तारुण्यात पदार्पण करते.   

तरुण तुलसी मालांनी मनातच भगवंत नटतो. ``तरुण तुलसीमाला’’ म्हणजे फुलावर आलेली तुळस! ती उपवर झाल्याचं की हो लक्षण!

तुळशीविवाहाचा सोहळा तर निसर्गानेच ठरवलाय. निमंत्रणाच्या अक्षता घेउन कितीजण उभे आहेत.

 

तुलसीविवाह

 

मात्रा - 8:8:8:6

 

श्रीरंगाचा तुळशीसंगे । विवाह निश्चित झाला हो

कार्तिक मासी शुद्ध द्वादशी । मुहूर्त गोरज ठरला हो

 

सुबक ठेंगणी तुळस साजिरी । शालु नेसली अंजीरी

निळा जांभळा पदरचि त्याचा । कशिदा त्यावर मंजीरी

 

तरु-पोशाखा-मधेचि यावे । नातलगांनी सार्‍या हो

वर्‍हाडास सार्‍याच कळविले । बेत ठरविला पक्का हो

 

बहिण सुभद्रा बनुनी कांचन । आकर्षक ती सजली हो

निळ्या जांभळ्या लाल फुलांची । नेसुन साडी हसली हो

 

तुळशी मागे उभा राहिला । पुंड्या ऊसचि मामा हो

गोड काम हे मला करू दे । धरुनी आग्रह ऐसा हो

 

वर्‍हाडातल्या मान्यवरांचे । स्वागत करण्या नटुनी हो

उभा गगनचाफा बनुनीया । बलरामचि तो ऐटित हो

 

चार पाकळ्यांच्या घंटांचे । नाजुक नाजुक लेवुन हो

अलंकार ते अंगावरती । शोभुन दिसती धवलचि हो

 

सजवितोच रांगोळ्या सुंदर । होति उपस्थित मुग्धचि हो

किती झुंबरे नाजुक नाजुक । वार्‍यावरती झुलती हो

कुणी जाहले शेवंती तर । मरवा चाफा कोणी हो

कुणी जाहले रातऽराणी । बोगनवेली कुंदचि हो

 

मोरपिशी रेशीमवस्त्र हे । नीलअंबराचे बहुमोल

नेसुन हरि हा दिसे देखणा । खिळले डोळे त्यावर हो

 

तरूण तुलसी मालांचे हे । बाहु घालुनी हरिकंठी

तुळस लाजुनी गोरीमोरी । हरि वक्षावर मुख लपवी

 

क्रोधे झाल्या भामा रुक्मिणि । पारिजात मोगरीच हो

झाडुन सारी फुले नि पाने । रुसून अंगणि बसल्या हो

 

सौख्याचा हा असे सोहळा । नवरा नवरीकडुनी हो

वर्‍हाडास आहेर मिळे तो । सुखसमृद्धी यांचा हो

------------------------------------------------------

अरुंधतीप्रवीणदीक्षित-