फरक

 

 

फरक

निष्पर्ण तरूवर एकावेळी । अंकुरती कोब किती ते

ते ताम्र कोंब पालवती सारे । बस आज उद्या फरकाने

 

लसलसती पर्णे, लाल गुलाबी । पोपटीच चमचमणारी

ती नटती हिरव्या गहिर्‍या रंगी । बस आज उद्या फरकानी

 

बहरतोच तरुवर एकावेळी । किति मोहक रंगफुलांनी

उमलत जाती फुले तरूवर । कुणि आधी कुणी नंतरी

 

तो बहर ओसरे एकावेळी । कोमेजति हासरी फुले

झरझर झरती त्या झाडापायी । लव आज उद्या फरकाने

 

तरुवरती हळु हळु दिसू लागती । मग घोस फळांचे उमदे

सारे पिकती एकावेळी परि, । पळ आधी नंतर असे

 

बहर संपता परि फुलाफळांचा । दमलेली उरती पाने

क्लांत पर्ण ते विश्रांतिस्तव  । क्षण सोबत बसती सारे

 

जणु कृतार्थतेच्या अपूर्वरंगी । पळ दो पळ खचित निथळती

मग निरोप घेती परस्परांचा । बस आज उद्या फरकानी

 

ती पाने पिवळी लाल मनोहर । निस्तेज क्लांतशी होती

हळु देठ सुटुनिया भिरभिरताती । कुणि आधी कुणी नंतरी

-----------------------------------------

लेखणीअरुंधतीची-

 

18ः14

आधी वा नंतर त कुणि / पळभर आधी वा नंतरी /