सूर्योदय

 

सूर्योदय

असे तेज ना दुजे पाहिले, खुजी सर्व तेजे

धगधगणारी अनलप्रभाहि, त्या पुढती लाजे

काय सोहळा काय दिमाखचि, रोज रोज गाजे

अरुणध्वज हा क्षितिजावरती प्रवेशता वेगे -----1

 

क्षणाक्षणाला रंग साजिरे उषा रंगवीते

रोज नव्या रंगानी नभ हे, उजळत नित जाते

उत्कंठित मन नभपटलावर चित्र रोज पाहे

जशी सजावट आज होतसे, उद्या तशीच नसे -----2

 

रंगहीन हे जग अंधारे, रंगत जाई न्यारे

नव रंगानी सजून अवनी, सज्ज स्वागतास्तवे

पायघड्यांस्तव उलगडले जणु गालिचे मखमली

सोनवर्ख सजवितो पाकळ्या गुलाब गुलबक्षी ----- 3

 

ऋतूप्रमाणे पुष्प कमानी नव्या नव्या सजती

मोहक सुंदर धुंद परिमळे अलि गुंजन करिती

स्वागत गीते रोज नवनवी, भाट रवीचे गाती

राहति गुंजत स्वर मधुर सुखे रोज आसमंती ----- 4

सप्तरंगि हे तुरंग अबलख, रथ घेऊन येती

रथी बैसला सहस्ररश्मी स्वामी जगत्पती

प्रभा तयाची सहस्र योजन पसरे सोनेरी

प्रतिभा हाची सुयोग्य परिचय प्रतिभावंतासी ----- 5

----------------------------------------------

अरुंधतीप्रवीणदीक्षित-

विश्वावसू ,चैत्र शु. तृतीया (गौरीची तीज)  31मार्च ,