उद्दिष्ट

 

उद्दिष्ट

प्रवाहासवे वाहती काटक्या ह्या

कुणी ह्या तरूच्या; कुणी त्या तरूच्या

कुणी वाळलेल्या, कुणी मोडलेल्या

गळाल्याच ज्या भार वृक्षास झाल्या ----- 1

 

तरू सोडता व्यर्थ झाले जिणे ते

असो येथ वा तेथ बेवारसाचे

जळाची दिशा, वेग वा भोवर्‍यांनी

कधी वाहती वा किनार्‍यास येती ----- 2

 

न राहे तयांसीच उद्दिष्ट काही

न अस्तित्त्व त्यांचे कुणा मान्य होई

मतीला असे पायबंदी जळाची

प्रवाही पडे त्या गती ना स्वतःची ----- 3

 

परी पाणपक्षीच चोचीमधूनी

तयांसीच एकेक गोळा करूनी

निवारा करी पाणवेलींवरी त्या

जळी भासती बेटुली पाचुची ज्या ----- 4

 

तरंगे तरंगांवरी तो निवारा

सदा ओंजळी घेऊनी पक्षिबाळा

तयांच्याच छोट्या पदाने सुखावे

पसाराच तो वाळल्या काटक्यांचा ----- 5

 

कशा पाणवेली, कुठे काटक्या त्या

तिरस्कार ज्यांचा जगानेच केला

नवा अर्थ त्यांच्या मिळे जीवनासी

घडे देखणी काटक्यांची हवेली ----- 6

-------------------------------

अरुंधतीप्रवीणदीक्षित

माघ कृ. चतुर्थी 16 फेब्रु.2025